„Við fylgj­um nám­skrá frá Páfag­arði líkt og aðrar Norður­landaþjóðir, för­um yfir sjö sakra­menti kaþólskr­ar trú­ar, boðorðin, trú­ar­játn­ing­una, bæn­ina og al­menna biblíu­fræðslu. Einnig leggj­um við áherslu á að kenna gildi krist­inn­ar trú­ar, til að mynda hvað það merk­ir í raun og veru að vera krist­in mann­eskja.Við ræðum við ferm­ing­ar­börn­in um helgisiðina, t.d. um það sem fram fer í mess­unni, og ger­um það á tungu­máli sem þau skilja.

Svo höf­um við verið að ræða um kær­leik­ann í víðu sam­hengi og fræðum um það sem Bibl­í­an kenn­ir um hann, það sem Jesús sagði og kenndi um kær­leik­ann og hvernig við get­um orðið læri­svein­ar Jesú hér á jörðinni, verið ljós af ljósi og kær­leiks­boðber­ar hans í lif­anda lífi.“

Kær­leiks­bréf í heima­verk­efni

Sem dæmi nefn­ir Unn­ur Guðný að þau hafi í vet­ur farið í æf­ingu þar sem þau sátu í hring með kerti og sögðu kær­leiks­ríka hluti við mann­eskj­una sem sat við hliðina á þeim. „Eins æfðu ferm­ing­ar­börn­in sig í að skrifa kær­leiks­bréf til ein­hvers sem þeim þykir vænt um, og marg­ir vildu skrifa fleiri en eitt bréf. Síðan var eitt af heima­verk­efn­un­um í vet­ur að vinna kær­leiks­verk fyr­ir aðra, en eitt af verk­un­um var þannig að þau máttu ekki láta vita að þau hefðu unnið verkið, svo sem að skafa snjó og ís af bíl fyr­ir ókunn­uga og fleira í svipuðum dúr.“

Unn­ur seg­ir að þau hafi verið dug­leg að æfa sig í bæn­inni í vet­ur og börn­in hafi verið hvött til að líta inn á við, finna hvernig þeim líður í hjart­anu og segja Jesú það með sín­um eig­in orðum, það sé mik­il­væg­ur hluti bænar­inn­ar.

Jesús þeirra besti vin­ur

„Von okk­ar er að þau finni að Jesús er þeirra besti vin­ur, og hann er alltaf til staðar og hlust­ar alltaf. Við biðjum sam­an og ferm­ing­ar­börn­in bjuggu einnig til bæn sam­an sem hóp­ur. Og svo er það rósakr­ans­bæn­in, bæn­in til heil­agr­ar Guðsmóður, en hún er mik­il­væg­ur hluti kaþólskr­ar trú­ar. Við bjugg­um til rósakr­ans úr kert­um í kirkj­unni og kveikt­um á kerti fyr­ir hverja bæn og hug­leidd­um leynd­ar­dóma hans, en rósakr­ans­bæn­in er fal­legt boð heil­agr­ar Guðsmóður um að fær­ast nær Jesú fyr­ir milli­göngu henn­ar.

Einnig höf­um við verið dug­leg að leika og skemmta okk­ur og meðal ann­ars fór­um við í óvissu­ferð sem byggðist á rat­leik. Rat­leik­ur­inn sner­ist um að leysa páfa úr haldi en bisk­up okk­ar, Davíð Tencer, tjáði börn­un­um að morgni dags að Frans páfa væri haldið föngn­um ein­hvers staðar á Íslandi og Páfag­arður hefði óskað eft­ir aðstoð hóps­ins við að finna hann. Hóp­ur­inn leysti þraut­ir og orðal­eiki og fór með bæn­ir til að fá vís­bend­ing­ar, en leik­ur­inn barst meðal ann­ars í Kar­melk­laust­ur og St. Jós­efs­kirkju í Hafnar­f­irði. Páfi fannst svo að lok­um bund­inn í skrúðhúsi í Krists­kirkju og urðu mikl­ir fagnaðar­fund­ir þegar hann var frelsaður.“

Hvaða áhrif hef­ur ferm­ing­ar­fræðslan á okk­ur sem full­orðin erum?

„Það er talið að heil­ag­ur Frans frá Ass­isi hafi sagt: „Boðið fagnaðar­er­indið en notið orð ef nauðsyn­legt er.“ Það hef­ur því verið mik­il hvatn­ing fyr­ir okk­ur sem stönd­um að þessu að leit­ast við að gera þetta sem best úr garði. Við leggj­um okk­ur fram við að fræðslan sé vönduð en jafn­framt skemmti­leg og að ferm­ing­ar­börn­un­um finn­ist þau vera mik­il­væg­ur hluti af kirkj­unni, sem er í raun stór fjöl­skylda.“

„Fyr­ir mig hef­ur þetta verið ein­stak­lega gef­andi starf, þar sem í raun og veru má segja að börn­in hafi verið að gefa mér ekki síður en ég þeim. Þau eru svo lif­andi, hug­mynda­rík og skemmti­leg. Ég get varla sett það í orð hvað þau eru frá­bær,“ seg­ir Unn­ur.

Hvaða til­gang hef­ur ferm­ing­in í kaþólskri trú?

„Ferm­ing­ar­sakra­mentið felst fyrst og fremst í að við ját­um að Jesús er leiðtogi lífs okk­ar. Við ferm­ing­una hljót­um við sjö gjaf­ir Heil­ags anda; vís­dóm, skiln­ing, ráðspeki, kraft, þekk­ingu, guðrækni og guðsótta, sem allt er mik­il­vægt vega­nesti í lífs­ins ólgu­sjó. Við ferm­ing­una staðfest­ist að heil­ag­ur andi var mót­tek­inn í skírn­inni og hún inn­sigl­ar að fullu að við til­heyr­um Guði og erum full­gild­ir meðlim­ir kirkju hans.“

Til hvers er ætl­ast af þeim sem til­heyra kirkj­unni og vilja vera virk­ir í trúnni?

„Í kaþólskri trú er ætl­ast til þess að kaþólsk­ir leik­menn séu við messu á sunnu­dög­um og aðra lög­bundna kirkju­daga, sem eru nokkr­ir í kirkju­ár­inu. Þeir eru 1. janú­ar – stór­hátíð Maríu Guðsmóður; pásk­ar; upp­stign­ing­ar­dag­ur; 15. ág­úst – upp­n­umn­ing Maríu til himna; 1. nóv­em­ber – allra­heil­agra­messa og jóla­dag­ur. Einnig er ætl­ast til að fólk gangi til skrifta minnst einu sinni á ári.“

Bæna­syst­ur og kær­leiks­boðber­ar

Mig lang­ar að spyrja þig aðeins út í nunn­urn­ar í Hafnar­f­irði og Kær­leiks­boðber­ana, hvað kenna þær okk­ur?

„Kar­melnunn­urn­ar í Hafnar­f­irði til­heyra bæna- og hug­leiðslu­reglu og til­einka líf sitt bæn­inni. Það er mjög dýr­mætt að hafa þær í sam­fé­lagi okk­ar. Til þeirra leit­ar stór hóp­ur fólks, bæði kaþólsk­ir og lút­ersk­ir, með ósk um fyr­ir­bæn á hverj­um degi, t.d. fyr­ir veik­um ást­vin­um o.s.frv. Í klaustr­inu búa tólf Kar­melnunn­ur sem helga sig bæn­inni í um átta klukku­stund­ir á sól­ar­hring. Þær tala ís­lensku og reka fal­lega versl­un sem sel­ur hand­verk og gjafa­vöru sem þær fram­leiða. Messað er í klaustr­inu á hverj­um degi og þangað koma marg­ir sér­stak­lega til að heyra tónlist systr­anna. Kar­melnunn­ur sinna einnig and­legri hand­leiðslu í bæna­lífi fyr­ir marga.

Í St. Jós­efs­kirkju og í Stykk­is­hólmi eru einnig syst­ur, þern­ur Drott­ins og Maríu meyj­ar frá Matará, en þær sinna mik­il­vægu safnaðar- og æsku­lýðsstarfi ásamt trú­fræðslu.

Kær­leiks­boðber­ar móður Teresu eru regla sem hef­ur það að meg­in­mark­miði að hlúa að okk­ar minnstu bræðrum og systr­um. Þær sinna óeig­in­gjörnu mannúðar­starfi. Þær heim­sækja til að mynda elli­heim­ili og fang­elsi og sinna trú­fræðslu. Þær reka mat­sal sem er opnaður þegar mörg­um gisti­skýl­um borg­ar­inn­ar er lokað á morgn­ana. Þangað streym­ir fólk úr ýms­um átt­um og fær morg­un­verð, fé­lags­skap, and­leg­an stuðning og hlýju. Þar er öll­um mætt með brosi og Teresu­syst­urn­ar láta verk­in tala.

Á Íslandi er einnig reglu­fólk á Ak­ur­eyri og svo er munkaklaust­ur Kapús­ína á Reyðarf­irði.

All­ar þess­ar kon­ur og karl­ar sem hafa helgað líf sitt þjón­ustu í þágu krist­inn­ar trú­ar eru mik­il­væg­ar fyr­ir­mynd­ir ungs fólks á Íslandi í dag.“

Eitt­hvað að lok­um?

„Ég vil nota tæki­færið og óska öll­um þeim börn­um, sem hafa tekið þá ákvörðun að ferm­ast í vor, hjart­an­lega til ham­ingju með ákvörðun­ina og ég sam­gleðst þeim inni­lega í hjart­anu.“